DIKJARAZZJONI TA’ ĊAĦDA TA’ RESPONSABBILTÀ: Din il-gwida tħejjiet mis-servizzi tal-Kummissjoni u ma torbotx lill-Kummissjoni Ewropea. Il-Qorti tal-Ġustizzja tal-Unjoni Ewropea biss hija kompetenti sabiex tinterpreta b’mod awtorevoli d-dritt tal-Unjoni.
L-obbligu li jiddaħħal manwalment fit-takografu s-simbolu tal-pajjiż li s-sewwieq jidħol fih wara li jaqsam fruntiera ta’ Stat Membru japplika mill-20 ta’ Awwissu 2020 għas-sewwieqa li jsuqu vetturi mgħammra b’takografu analogu skont l-Artikolu 34(6)(f) tar-Regolament (UE) Nru 165/2014, u mit-2 ta’ Frar 2022 għas-sewwieqa li jkunu qed isuqu vetturi mgħammra b’takografu diġitali, inkluża l-ewwel verżjoni tat-takografu intelliġenti (1), skont it-tieni subparagrafu tal-Artikolu 34(7) ta’ dak ir-Regolament.
L-objettiv ewlieni ta’ dawn id-dispożizzjonijiet huwa li jiffaċilitaw l-infurzar tad-dispożizzjonijiet dwar l-operazzjonijiet ta’ kabotaġġ(2) u dwar l-istazzjonar tax-xufiera(3), għalkemm dan japplika għall-vetturi kollha koperti mir-Regolament (UE) Nru 165/2014, irrispettivament mit-tip ta’ operazzjoni mwettqa.
Dan ir-rekwiżit huwa miżura tranżizzjonali qabel ma verżjoni ġdida tat-takografu intelliġenti(4) tkun tista’ tirreġistra awtomatikament il-qsim tal-fruntieri. Il-vetturi kollha rreġistrati għall-ewwel darba mill-21 ta’ Awwissu 2023 jridu jkunu mgħammra b’takografu bħal dan(5). Il-vetturi li bħalissa huma mgħammra b’takografu analogu jew diġitali mhux intelliġenti se jkollhom jiġu mmodifikati b’dan it-takografu ġdid sa mhux aktar tard mill-31 ta’ Diċembru 2024(6), filwaqt li l-vetturi li bħalissa huma mgħammra b’takografu intelliġenti se jkollhom sa mhux aktar tard mit-18 ta’ Awwissu 2025 biex jiġu mmodifikati(7). Fl-aħħar nett, il-vetturi kummerċjali ħfief kollha li l-massa massima permissibbli tagħhom hija ta’ bejn 2.5 u 3.5 tunnellati u li huma involuti fit-trasport internazzjonali jew f’attivitajiet ta’ kabotaġġ se jkollhom jiġu mgħammra b’dan it-takografu mill-1 ta’ Lulju 2026, b’applikazzjoni tal-Artikolu 2(1)(aa) tar-Regolament (KE) Nru 561/2006(8).
(1)Takografi intelliġenti li jikkonformaw mal-Anness IC tar-Regolament ta’ Implimentazzjoni tal-Kummissjoni (UE) 2016/799 sal-20 ta’ Awwissu 2023.
(2)Ir-Regolament (KE) Nru 1072/2009 tal-Parlament Ewropew u tal-Kunsill tal-21 ta' Ottubru 2009 dwar regoli komuni għall-aċċess għas-suq internazzjonali tat-trasport bit-triq tal-merkanzija.
(3)Id-Direttiva (UE) 2020/1057 tal-Parlament Ewropew u tal-Kunsill tal-15 ta’ Lulju 2020 li tistabbilixxi regoli speċifiċi rigward id-Direttiva 96/71/KE u d-Direttiva 2014/67/UE għall-istazzjonar tax-xufiera fis-settur tat-trasport bit-triq u li temenda d-Direttiva 2006/22/KE fir-rigward ta’ rekwiżiti tal-infurzar u r-Regolament (UE) Nru 1024/2012.
(4) Takografu intelliġenti li jikkonforma mal-Anness IC tar-Regolament ta’ Implimentazzjoni tal-Kummissjoni (UE) 2016/799, kif emendat bir-Regolament ta’ Implimentazzjoni tal-Kummissjoni (UE) 2021/1228 tas-16 ta’ Lulju 2021 li jemenda r-Regolament ta’ Implimentazzjoni (UE) 2016/799 fir-rigward tar-rekwiżiti għall-kostruzzjoni, l-ittestjar, l-installazzjoni, l-operazzjoni u t-tiswija ta’ takografi intelliġenti u l-komponenti tagħhom.
(5) L-Artikolu 8(1), ir-raba’ subparagrafu tar-Regolament (UE) Nru 165/2014, flimkien mal-Artikolu 2 tar-Regolament ta’ Implimentazzjoni tal-Kummissjoni (UE) 2021/1228.
(6) L-Artikolu 3(4) tar-Regolament (UE) Nru 165/2014).
(7) L-Artikolu 3(4a) tar-Regolament (UE) Nru 165/2014).
(8)Ir-Regolament (KE) Nru 561/2006 tal-Parlament Ewropew u tal-Kunsill tal- 15 ta' Marzu 2006 dwar l-armonizzazzjoni ta' ċerta leġiżlazzjoni soċjali li għandha x'taqsam mat-trasport bit-triq u li jemenda r-Regolamenti tal-Kunsill (KEE) Nru 3821/85 u (KE) Nru 2135/98 u li jħassar ir-Regolament tal-Kunsill (KEE) Nru 3820/85.
Ir-Regolament (UE) Nru 165/2014 jipprovdi li r-reġistrazzjoni manwali tas-simbolu tal-pajjiż għandha ssir “fil-bidu tal-ewwel waqfa tas-sewwieq f’dak l-Istat Membru”, li għandha ssir “fl-eqreb post ta’ waqfien possibbli fil-fruntiera jew wara li tinqasam il-fruntiera”.
Is-sikurezza fit-toroq hija waħda mill-objettivi ewlenin tar-Regolament (KE) Nru 561/2006 dwar il-ħinijiet tas-sewqan, il-pawżi u l-perjodi ta’ mistrieħ, u t-takografu huwa l-għodda ewlenija biex tiġi vverifikata l-konformità ma’ dawn id-dispożizzjonijiet. F’dan il-kuntest, il-konformità tal-obbligu li wieħed idaħħal il-qsim tal-fruntieri manwalment fl-ebda każ ma għandha tipperikola l-obbligi u r-rekwiżiti tas-sikurezza fit-toroq stabbiliti fil-leġiżlazzjoni tal-UE u l-leġiżlazzjonijiet nazzjonali. Għalhekk, il-valutazzjoni ta’ x’jikkostitwixxi l-“eqreb post ta’ waqfien possibbli” trid tqis bis-sħiħ ir-regoli u r-restrizzjonijiet tas-sikurezza fit-toroq fil-mument meta s-sewwieq jiddeċiedi fejn għandu jieqaf għal dan il-għan. B’mod partikolari, jenħtieġ li jitqies in-nuqqas possibbli ta’ spazji ta’ parkeġġ disponibbli fiż-żoni tal-fruntiera, sabiex jiġu evitati r-riskji li jinħolqu konġestjonijiet perikolużi f’żoni bħal dawn.
Eżempju 1: Il-korsija ta’ emerġenza m’għandhiex titqies bħala “post ta’ waqfien possibbli” għall-iskop uniku ta’ konformità ma’ din id-dispożizzjoni, peress li dan x’aktarx ikun bi ksur tar-rekwiżiti tas-sikurezza fit-toroq, bħar-regoli tat-traffiku nazzjonali.
Eżempju 2: Wara li jkun qasam fruntiera, sewwieq jara li l-korsija ta’ deċellerazzjoni lejn l-ewwel żona ta’ parkeġġ hi mblukkata u/jew il-parkeġġ ikun diġà mimli totalment. F’din is-sitwazzjoni, is-sewwieq għandu żewġ għażliet: jew iżid mal-konġestjoni tal-korsija ta’ deċellerazzjoni, jew ikompli r-rotta tiegħu. Fejn l-ewwel għażla tipperikola s-sikurezza fit-toroq (b’mod partikolari għall-vetturi ta’ wara), tali żona ta’ parkeġġ konġestjonata jenħtieġ li ma titqiesx bħala “post ta’ waqfien possibbli” skont it-tifsira tar-Regolament (UE) Nru 165/2014. Is-sewwieq għandu jagħżel it-tieni għażla u jkompli r-rotta tiegħu sal-post ta’ waqfien possibbli li jmiss. Konsegwentement, l-istess żona ta’ parkeġġ tista’ tkun “l-eqreb post ta’ waqfien possibbli” għal sewwieq wieħed, iżda mhux għal ieħor li jgħaddi minnha f’ħin jew f’data oħra.
Konklużjoni:
L-awtoritajiet tal-infurzar, li fl-aħħar mill-aħħar se jinfurzaw din id-dispożizzjoni fuq il-post, huma mistennija li japplikaw il-punt (f) tal-Artikolu 34(6) u t-tieni subparagrafu tal-Artikolu 34(7) tar-Regolament (UE) Nru 165/2014 filwaqt li jqisu t-tħassib dwar is-sikurezza fit-toroq u l-flessibbiltà li jinvolvi l-kunċett ta’ “l-eqreb post ta’ waqfien possibbli”. Għalhekk, meta tiġi vverifikata l-konformità mal-obbligu li jiġi rreġistrat il-qsim tal-fruntieri fuq it-takografu, dawn iridu jqisu ċ-ċirkostanzi kollha tat-traffiku u r-restrizzjonijiet kollha tas-sikurezza fit-toroq.
Bl-istess mod, l-impriżi tat-trasport huma mistennija li jagħtu struzzjonijiet xierqa lis-sewwieqa tagħhom dwar kif jistgħu jikkonformaw mar-regoli dwar il-ħin tas-sewqan u tal-mistrieħ, kif meħtieġ mir-Regolament (KE) Nru 561/2006(1) u d-Direttiva (UE) 2020/1057.
(1) L-Artikolu 10(2) tar-Regolament (KE) Nru 561/2006).